De Dörpelmaeg, ein vereiniging die besjteit oet allein dames, viert dit jaor hun 5×11 jaorig besjtaon. De oorsjprong van de Dörpelmaeg lègk al in de jaore 50 van de veurige eeuw toen in Zitterd ein aantal dameskeigelvereiniginge waar. Op de keigelbane van hotel ‘De Zwaan’ in de Brandjstraot woort neit alleen gesjtreeje om de punte, mer waar ’t veural gezellig. Toen in 1961 de keigelbane woorte gesjlaote moosjte de dames op zuik nao get angesj. Doordat de meiste dames toen get mit Vastelaovend hawwe woort op 11 November 1961 de damesvastelaovesvereiniging De Dörpelmaeg opgerich.
In de aafgeloupe 55 jaor zeen de Dörpelmaeg ein begrip gewore in Zitterd en nog ummer sjpinglaevend. Herkenbaar veur de Dörpelmaeg is hun blauw uniform mit de geroete sjolk en blauw pelerine. De Dörpelmaeg zeen neit mee weg te dènke bie tal van aktiviteite en zeen veural aktief in ’t Vastelaovessezoen. Zo äöpene zie tradisjoneel de kènjeroptoch door mit hunne bessem de waeg te kaere veur de mechelkes en sjnaake en de intoch van de Sjtadsprins en trekke zie jaorliks mit in de groote optoch. Ouch gaon zie al jaore same mit de Prinsegarde Zitterd nao ’t Euregionaal Gardetreffe. Mit haufvaste zeen de dames prezent bie ’t Krombroodrape en de letste jaore doon zie ouch mit aan ’t Alternatief sjöttefees.
Anger vereiniginge doon nooit vergaefs ein beroup op de hulp van de Dörpelmaeg, zo ongersjteune zie al jaore ’t Optochkommitee Zitterd mit de verkoup van de ‘Veer sjteune de Optoch’ vaenkes en assisteiere zie al mee es 30jaor Sjtadskapel ’t Trumke en ’t Tröötje bie ’t gehandicaptencarnaval.
De dames van de Dörpelmaeg viere hun 5×11 jaorig jubbelei op zaoterdig 19 November in ’t Gulickshoes. Vanaaf 19.33oer hauwte zie ein resepse mit aansjloetend eine gezellige feesaovend mit optraejes van Zittesje artiste en DJ Zaelke Power.
