NUUTS

Webdesign: RBZitterd 2011

THOES NUUTS
DE PRINS PROGRAMM
OPTOCHTEMEZIEK
FOTO ALBUMHISTORIE
LINKS E-MEEL

07-02-2012: VRIEDIG 10 FIBBERWARIE: ZITTING LÖMMERICHERVELDJ/HOOGVELD

Vriedig 10 Fibberwarie sjteit de tweede wiekzitting van de Marotte op ut programm. Dees zitting is wurt net es veurigjaor weier gehauwte in ’t Gemeinsjapshoes in Lömmericherveldj. De zaal is vanaaf 19.33 oer geaopend en de zitting begint om 20.00 oer, veur aanvangk van de zitting zörge zittesje artieste alvas veur de richtige sjtömming. Op ut Programm van dees zitting twee toppesj van ut LVK. Es eesjte is ’t de beurt aan La Bamba, zie höbbe meerdere kere de finale van ut LVk gehaold mit onger angere ‘Drök, Drök, Drök’ en ‘Knaokehel op det vel’. Dit jaot sjtong |La Bamba in de finale mit ‘Waatse hiej zuus dat zuuste nörges’. De tweeede LVK topper is De Toddezek oet Grubbevors. Zie höbbe in 2007 ut LVK gewonne mit ‘Heej blief ik Plekke’ en in 2009 mit ‘Nie mier en nie minder’, dit jaor behaolde zien mit ‘De Miemelaer’ en tweede plaatsj. Veur de neudige lach zal meervoudig Limburgs buutekampioen Pierre van helden zörge, mit ein van zien kolderieke buuts.Ut programm vervolg mit Frans ‘Sjeng aon de geng’ Theunisz en es finale van de zitting ut grootste Limburgse Feesbees Big Benny, dae ein waarsjienlik bomvol gemeinsjapshoes aan ut zènge en sjprènge zal kriege. De muzikaal omliesting is in vertroewde henj van de Marottekapel.

Kaarte veur de zitting zeen te koup in de Marottewinkel, gemeinsjapshoes Lömmericherveldj, Eveline Mode winkelcentrum Lömmericherveldj en bie de kantines van voetbalvereiniginge VVS en OVCS.

04-02-2012: FINALE LVK: ’DE SJEIGEL’ 10de, W-DREEJ WINT

Gisteraovend waar in Eijsde-Mergraote de finale van ut Limburgs vastelaovesleedjes Konkour. Cyrille Niël behaolde mit de Zittesje Sjlaager ‘De Sjpeigel’ein 10de plaatsj, daomit eindigde hae net achter Kartoesj die mit ‘Loate Ver Blie Zin, Dat Ver D'r Bie Zin’ op ein 9de plaatsj eindigde. De euverwinning van ut LVK ging veur ut driede jaor op riej nao W-Dreej oet Venlo mit ut leedje ‘Doot s Gek’, zie kreege van drie van de vief zjuries ut maximale aantal van zesteen punte. De Toddezek oet Grubbevors hehaolde mit ‘De Miemelaer’ en tweede plaatsj vlak veur de Geliende oet Hulsberg mit ‘Hand in Hand veur vastelaovend’.

Ut LVK finale optraeje van Cyrille Niël is hiej nog ens tròk te kieke. Mee informase euver ut LVK is te laeze op de websait van de sjtichting LVK

03-02-2012: KENJEROPTOCH AUCH DIT JAOR WEIER OP TV

Zowaal L1 TV es Sjtreekomroop Sjtart zulle dit jaor de KenjerOptoch op TV oetzende. L1 zal dit laif doon vanaaf de Mert en auch beelde oetzende van de appelesieneraege. De kamera’s van Start komme in de Meulebaeksjtraot te sjtaon, dees beelde waere saoves (12-02) oetgezonje vanaaf 18.00 oer.

Aanmelje veur de KenjerOptoch is neit neudig jeederin kent zonder zich veuraaf op te gaeve mittrekke. Waal vreug ut Optochkommitee veural de grote groppe om hun motto door te gaeve mit ein omsjrieving wat ze gaon oetbeelde, zodat de versjlaaggaevesj infermase höbbe euver waat wurt oetgebeeld en bie de groppe get euver euver ut motto kenne vertelle. Dit gaer doorgaeve aan Cor Baltis van ut Optochkommitee via info@optoch.nl of Cor@optoch.nl

03-02-2012: JAOR ORDE 2012: HOMMAASJ AAN ’T ZITTESJ AUWT WIEF

Tradisjoneel reike de Marotte jeederjaor ein jaor orde oet aan luuj die zich spisjaal in ut sezoen höbbe ingezat veur de Zittesje Vastelaovend. In 2006 zeen de Marotte gesjtart mit ein reeks van 11 jaorordes die es eine puzzel in ein passe. Ut basisonwerp van de jaorordes is gemaak door Jan Ruight, same mit Claudia van Tiggelen maak hae jeederjaor ut oetgewirk ontwerp veur de jaor orde. De jaor orde van dit jaor is veur ontwerper Jan Ruigte ein bezunjer medaaje omdat dit de eesjte oet de serie van e11 is hae haet ontworpe. Veur häöm de meis sjpisjale is de jaor orde van 2006, ut jaor dat ziene zoon Paul es Sjtadsprins euver ut Marotteriek regeierde.

Jeederjaor sjteit ein gebroek of gebeurtinis centraal op de jaor orde, dit jaor is dat ut Zittesj Auwt Wief. Ondanks dat de Nach van ut Auwt Wief dit jaor neit door de Marotte wurt georganizeiert, leet de jaor orde zeen dat ut Auwt Wief nog ummer sjpringlaevend is en dat ut Auwt Wieverbal altied zal doorgaon.

De eesjte medaajes zeen volgens tradisie op 1 Jannewarie oetgereik aan Daeke van Rens en börgemeister Cox van Zitterd-Gelaen. Nao de oetruiping krig de Prins de jaororde oetreik en blif dees pes in lengte van jaore drage es teike van zien Prinssjap in dat jaor. Alle deilnummesj aan de KenjerOptoch kriege ein plestike replika van de medaaje oetgereik es aandenke aan de deilname aan de KenjerOptoch. Ein sjpengske mit de aafbeeling van de medaaje is te koup in de Marotte winkel, auch zeen hiej de eerdere jaor ordes oet de serie es sjpengske te kriege. De sjpenkskes van de jaor ordes zeen auch te koup via de Marotte Websjop en bie Fotograaf Ton Dirkx.

02-02-2012: LVK FINALE MIT DE ZITTESJE SJLAAGER ‘DE SJPEIGEL’

Vriedig 3 Fibberwarie is in Eijsde-Mergraote de Finale van ut Limburgs Vastelaovesleedjes Konkour. Dit jaor haet de Zittesje Sjlaager ‘De Sjpeigel’, mit zangk van Cyrille Niel en gesjreve door John Smeets en Gian Prince, de finale van ut LVK weite te haole. De zjurering in de finale is dit jaor aangepas zo zeen d’r jaor nog mer vief zjuries. De zjuries zeen de punte van de hoofzjurie, auwt LVK finaliste, Limburgse medieja, De Limburgse vastelaovesvereiniginge en ‘Ut volk van Limburg’. Bie dees letste zjurie kent jeederein mitsjtömme via de tillefoon en SMS. Sjeun dan auch in de finale ‘De Sjpeigel’ en bel of SMS en help Zitterd ut LVK te wenne. SMSe en belle kent allein in de pauze van ut LVK es alle 19 de finaliste hun optraeje höbbe gedaon. De finale van ut LVK is laif te bekieke op L1 radio en TV

Veur te sjtömme: SMS: LVK04 nao 4422 of bel nao 0909-2027030 en keis van 04.

02-02-2012: ZONDIG 5 FIBBERWARIE: KENJERZITTING

Zondig 5 Fibberwarie is in de Fanfaarzaal van Fanfaar Sint Jan oet Leijebrouk de kenjerzitting van de Marotte. De zaal geit aope vanaaf 13.33oer en de kenjerzitting begint om 14.00 oer. Ouwesj kenne bie de kenjer blieve mer veur hun is get te drinke te kriege acher in de zaal.

Ut thema van de Kenerzitting is dit jaor Pirate. Alle kenjer komme natuurlik verkleid nao de zitting, veur de sjoonst verkleide kenjer en sjoonst verkleide pap en mam haet Prins Funs II ein verrasjing. Jeeder kentj krig ein eige knipkaart wo mit de ganse middig versjillende lekkere traktasies is te kriege.

De Marotte en Prins Funs II zeen natuurlik aanwezig op de Kenjerzitting. Prins Funs II zal prieze oetreike aan de winnaesj van de kleurplate wedsjtried en aan de winnaer van ut ontwerp van de Vastelaovessjtikker. Prins Funs II krig ongersjteuning van de kenjer raod van ellef, die dit jaor besjteit oet kenjer van Basissjool ‘t Mozaiek en van de Vlemkes.

Optraejes zeen d’r van De Sjtadssjool mit ut kenjer Vastelaovesleedjes womit zie ut KVL höbbe gewonne ‘Trek mer mit os mit’. Paul-Jean Jessen zingk same mit de kenjer auw zittesje Vastelaovessjlagesj en zien naefke Tristan Jessen zèngk es jonge zenger op de Marotte Cd ‘Zittesje Sjnaak’. De Marottekapel zorg veur de neudige muzikaal klanke en auch de jongste kapel van Zitterd ‘De Kenjerkapel’ leet häör muzikaal klanke klinke. Door de ganse kenjerzitting haer zorg e de maedjes van Jazz Dance Swentibold veur de neudige bewaeging en dans, zo zulle zie onger angere danse op ‘Vandaag’ en de remix van ‘Ut eesjte Muulke’. Clown Rinaldo zal veur de neudige lach gaon zörge. De kenjerzitting wurt aafgesjlaote door Cyrille Niel dae same mit alle kenjer de sjlaager van dit jaor ‘De Sjpeigel’ zal zenge. Kaarte veur de Kenjerzitting koste veur zowaal kenjer es ouwesj €3,00 en zeen te koup in de marottewinkel en bie sigaresjpisjaalzaak Augustus van Neer.

31-01-2012: TRADISJONELE ZITTING LEIJEBROUK

Vrieding 3 Fibberwarie is de tradisjoneel wiek-zitting van de Marotte Zitterd in Leijebrouk. Dees zitting wurt gehauwte in de fanfaarzaal van fanfaar Sint Jan, de zaal is vanaaf 19.33 oer geaopend en de zitting begint om 20.00 oer. Veur aanvangk van de zitting zörge zittesje artieste alvas veur de richtige sjtömming. Nao de intoch van de Marotte, Vors Marot en Sjtadsprins Funs II wurt de zitting geaopend door Peter Vaessen. Mit zien buut ‘Krank of Gek’ behaolde hae dit jaor ein derde plaatsj op ut Limburgs Buutekampioensjap en zal hae al metein veur de neudige lach zörge. Nao de buut wurt de zitting internasjonaal vervolg mit Dömm en Dööl oet ut Belzje Kelmis. Zie sjtaon bèkend om hun jaorliks nuuj en sjitterende kestuums en hun leedjes mit ein hoog mitzèng en mitdoon gehalte. Henrie van Geneijnen zal vervolges es ‘Paosjhaas’ eine aansjlaag op de lachspiere doon, mit dees buut behaolde hae veurigjaor ein tweede plaatsj op ut Limburgs Buutekampioensjap. De zitting wurt aafgesjlaote door Erwin, ein paar jaor trök zong hae ein vol Ahoy in bewaeging, get wat hae mit de fanfaarzaal auch waal zal gaon doon. De Marottekapel zorg weier veur de muzikaal omliesting. Kaarte veur de Leijebroukzitting zeen te koup in de Marottewinkel, kafee ’t Duuvelke (Helsjtraot) en bie Fanfaar Sint Jan.

30-01-2012: LEICH IN ‘T DUUSTER, EVENEMENT VEUR JEUG VAN 12-16 JAOR

Leich in ’t Duuster, auch waal bekend es ‘Glow in the Dark’ is ut thema van ein nuuj inisjatief van de Marotte. Dit evenement is spisjaal veur de jeug van 12 pes 16 jaor van Zitterd en omgaeving, bezunjer hie aan is dat ut auch wurt georganizeiert door de jeug. Leich in ’t Duuster wurt gehauwte op Vriedig 3 Fibberwarie van 20.00 per 00.00 oer in ut gemeinsjapshoes Lömmericherveldj.

De Marotte rich zich al versjillende jaore op de jeug om hun mee bie de Vastelaovend te betrekke, zo sjteit al jaore langk de Kenjerzitting op ut programm, is de vriedig veur Vastelaovens op de Mert ut Sjoliere-carnaval en haet ut Trevianum zien ‘Poetebal’. Allein in ut Vastelaovesprogramm van de Marotte ontbrouk nog ein evenement sjpisjaal veur de jeug tössje de 12 en 16 jaor, dao kump dit jaor dan auch de verangering in mit Leich in ’t Duuster.

Leich in ’t duuster wurt zeker geine geweune dansaovend mit eine DJ mer d’r is vööl mee. De aovend wurt mee ein konzer mit bie jeedere arties ein anger belaevenis. Arieste die zulle optraeje zeen ut grootste Feesbees van Limburg: Big Benny, de Shanking DJ’s die auw Vastelaovesleedjes mit eine beat in ein nuut jeske sjtaeke en Lotte, auwt winneres van ut Kenjer Vastelaovesleedjes Festival, mer zie zengk noe Limburge Pop nummesj mer auch covers van oa Anouk. Dit zeen nog mer ein paar van de artieste die gaon optraeje de res blif nog ein verrasjing.

Op de buun wurt onger angere gebroek gemaak van LED-sjerme die zörge veur ein jong en innovatief beeld van ein zitting anno 2012. Veur jeedere bezuiker is d’r nog ein verrasjing die alles mit ut thema van de aovend haet te make. De dresscode veur de aovend is ‘leich-gaevend’, voor de sjoonste/orzineelste verkleide is eine sjpisjlae pries dae door Sjtadsprins Funs II wurt oetgereik.

Kaarte veur ‘Leich in ’t Duuster’, zeen veur €5,- te koup bie de Marotte winkel al zeen dit gein kaarte mer wie ut bie jeugevenemente gebroekelik is poslbendjes!! Mee infermase is auch te vènje op de ut Marottejeug Feesbouk en Hyves, taeves zeen hiej leuke prieze te wènne.

AANVULLING: Door krankheid haet Lotte haor optaeje motte aafzègge, zie wurt vervange door Chazz en Pink Power allebei deilnummesj aan ut Tiener Vastelaovesleedjes Konkour.

29-01-2012: SJTADSSJOOL WÈNT KINGER VASTELAOVEND LEEDJESFESTIVAL

De Sjtadssjool haet mit ut Zittesj Kenjer Vastelaovesleidje ‘Trek mer mit os mit’ ut Kinger Vastelaovend leedjesfestival gewonne. De finale van dit Vastelaovesleedjesfestival door en veur kenjer waar vandaag in Palladio in Helje. Mit ein daverende ekt wis de Sjtadssjool van alle deilnummesj de zjurie ut meis te euvertuuge. Bie de oetsjlaag waar de sjpanning enorm mèr toen de oetsjlaag bekend woort en de Sjtadssjool pès wènnaer woort oetgeroupe ging ut daak draaf. Naeve de fillesetasies aan de sjtadssjool auch de fillesetasies aan de sjrievesj van ut leidje John Smeets en Gian Prince. De Sjtadssjool zorg auch veur eine primeur want nog nooit eerder haet Zitterd ut KVL gewonne. Naeve de trofee dae bie de euverwinning heurt mer maag de Sjtadssjool es wènnaer van ut KVL noe auch optraeje op alle grote Vastelaovesevenemente in Limburg es de Boetezitting in de Zoepkoel op Vastelaoveszaoterig, de Vastelaovesfinale op Vastelaovesdaensdig in Gullepe en natuurlik traeje zie op bie ut Kanon van ut Balkon. Bekiek hiej de viediejoklip van ‘Trek mer mit os mit’ die in November is opgenomme.

26-01-2012: 3X11 JAOR KAPEL HOU OP DIE KIS

Dit jaor besjteit kapel Hou op die Kis 3x 11 jaor, zie viere dit op zondig 29 Jannewarie vanaaf 14.33 oer mit eine Feesmiddig in kafee Schtad Zitterd. Naeve de muzikaal klanke Hou op die Kis zellef, zeen op d’r optraejes van kapel Wie dekker wie leever oet Baek en versjillende Zittesje artieste.

Laes hiej ein persberich oet de Trompetter euver 3x11 jaor Hou op die Kis.

26-01-2012: MAONDIG 30 JANNEWARIE SENIOREZITTING

Maondig 30 Jannewarie vanaaf 14.00 oer is in de Sjouwburg de ongertössje tradisjoneel Seniorezitting van de Marotte in samewirking mit de Zonnebloem Zitterd. Op ut programm sjtaon optraejes van onger angere Wil en Annie en Frans ‘Sjeng aon de Geng’ Theunisz. Vervolges is ut de beurt aan ut duo Thei & Marij, zie sjtonge aafgeloupe jaor op de eesjte plaatsj in de Limbo top100 mit ‘Ut Veldboeket’ en höbbe van dat leidje rondj Zitterd ein viediejoklip ogenomme. Voor de neudige lach zorg meervoudig Limburgs Buutekampioen Hub Stassen. Tot sjlot zulle de Kammeraodjes oet Venlo optraeje, mit de zeker bie de seniore bekende leedjes es ‘As de Sjterre’, ‘Jozefien’ en ‘ut Zunke’. Wieër nog op ut programm de Zittesje Kenjerkapel, Basissjool de Sjtadssjool mit ut Kenjer Vastelaovesleidje van dit jaor ‘Trek mer mit os mit’, womit zie in de finale van ut Kenjer Vastelaovesleedjes festival sjtaon, en Jazz Dance Swentibold.

Kaarte veur de seniorezitting zeen veur €11,- te koup bie de Marotte winkel op de Brandjstraot, Sigare sjpisjaalzaak Augustus van Neer, bie de sjouwburg en bie ut sikretarriaat van de Zonnebloem Zitterd via 046-4200056.

24-01-2012: ZONDIG 29 JANNEWARIE: RESEPSE SJTADSPRINS FUNS II

Zondig 29 Jannewarie vèngk de resepse plaatsj van Sjtadsprins Funs II. De resepse is dit jaor in ut Forum tejater aan de Engelempsjtraot, de veurmalige Forum Bioskoop. (Engelekampsjtraot 68 Zitterd). Tössje 13.00 en 15.00 oer is jederein in de gelaeg om Prins Funs II te filleseteiere mit zien Prinssjap en te prooste op de Zittesje Vastaovend. Op de oetneudigingskaart die versjtuurd is nao femieje en relasies sjteit es thema: ’t Zit bie os in de femieje, de titel van ut bekende leidje van kartoesj. Ut thema verwis d’r nao dat Funs de derde Sjtadsprins is oet de femieje Hermans, nao ziene Pap Ron en zien euvergrootvader Harrie.

Veur de kenjer is volop anemase zo-es sjmike, kleure, sjpelle en hun haet Sjtadsprins Funs II ein sjpissjaal verrasjing. De resepse van Sjtadsprins Funs II, wurt mit georganizeierd en finansjeel muigelik gemaak door de Senaat van de Marotte.

Naeve de resepse is auch ein sinjeersessie van ut bouk mit u Vastelaovesverhaol ‘Pap es ich groot ben’ dat pas door de Marotte is oetgebrach. Sjriever Patrick Werdens en Sandy Moerskofski die de teikeninge veur ut bouk maakte zeen vanaaf 13.33 oer aanwezig om ut bouk te sinjere en te veurzeen van eine perseunkikke noot. Veur wae nog gein bouk haet gekoch is de muigelikheid dit op de resepse te koupe, mer auch eerder gekochte buik kent me laote sinjere.

19-01-2012: RONDJLEIDINGE DOOR DE OPTOCHHAL

De bekende groote Vastelaoveswaages oet de Groote Optoch waere allemaol geboewt in de Optochhal op ’t industrieterrein aan de Bergerwaeg. Al jaore langk verzörg op Optochkommitee rondjleidinge door de Optochhal veur sjoole oet Zitterd en omgaeving om de kènjer op dees manneier ein kiekste te gaeve wie de vastelaoveswaages waere geboewd. Hie maake jeeder jaor mee sjoole gebroek van en niet allein sjoole mer auch vereiniginge, insjtèllinge en klups oet de regio en de ganse provincie wiete de waeg nao de Optochhal te vènje veur ein rondjleiding.

Ein rondjleiding in de Optochhal besjteit oet twee gedeilte. Es eeste wurt in de Heksesjans (ut kafee in de Optochhal) oetlegk gegaeve euver de Zittesje Vastelaovend mit zien tradiesies en de optochhal zellef. Ut tweede gedeilte is de rondjleiding door de optochhal wo de waages waere geboewt. Dao volg de oetlegk euver ut boewe van de waages en vertelle de buurte euver ut ontsjtaon, ut boewe en ut wat zie gaon oetbeedle op de waage.

De Rondjleidinge in de Optochhal waere verzörg door zöstal vriewilligesj. Ein rondjleiding in de Optochhal kent alleein op aafsjpraok. Hieveur kent me kontak opnumme mit Chris Maas (ere-lid) van ut Optochkommitee Zitterd, dit kent tiffelonisch via 046-4588766 / 06-46031313 of via emeel: Chris.maas@optoch.nl.

17-01-2012: 21 JANNEWARIE: INSJTALLASE SJTADSPRINS FUNS II

Zaoterdig 21 Jannewarie om 20.00 oer is in de DSM-zaal van de sjouwburg de insjtelasezitting van Prins Funs II. De insjtelasezitting is ein zitting die in ut teike sjteit van komme en gaon.

In ut gedeilte veur de pauze sjteit nog eine keer de dan nog regeierende Prins Tom I centraal. Nao de intoch van de Marotte en de dan nog regeierende Sjtadsprins Tom I, wurt Prins Tom geplök en mot hae de bie ut prinssjap beheurende teikes inlevere. Zo zal hae de prinsemotsj mit de vaere, de ketting mit de nonnevot en pappegey en de septer motte inlevere. Nao ut plökke zal de dan ex prins Tom zien dankwoord oetsjprake en trök kieke op ein geweldig sezoen dat hae haet gehad in zien prinssjap. Zo waar hae es Sjtadsprins te gas bie Minister Verhagen in Den Haag en op mee es honderd anger plaatsje en waar de groote optoch wo hae ut sjtraolend sjlotsjtuk waar bie de NOS op TV. Nao zien dankwoord brenge de Auwt Prinse hun tradisjonele Grosse nummer, hiemit kieke zie op ein humoristise manneier trok op ut aafgeloupe jaor. Waat en wae de auwt prinse in hun Grosse nummer onger de loep numme is wie gebroekelik ein van de bes bewaarde geheime en weite zelfs neet ens alle leede van de auwt prinse veuraaf. Aan ut einde van de Grosse nummer numme de Auwt Prinse Tom op binne hun vereiniging en krig Tom de Auwt Prinse Möts, zodat jeederein haom kent herkinne es Auwt Prins Tom I.

Nao de pauze sjteit de zitting in ut teike van de insjtelase Funs Hermans pes de 81ste Sjtadsprins van Zitterd, Prins Funs II. Mit ein kolderieke ekt wurt Funs op de buun gebrach door femieje, vrunj, buurt en vereiniginge. In de ekt illemènte die verwieze nao de nuuje Sjtadsprins en aktuweel zake. Zo zulle zien sjtudentelaeve, hockey en zien Prinselikke veurgengesj oet de femieje vàs in de ekt veurkomme. Aan ut ènj van dees ekt kump Funs op de buun zodat hae door Vors Marot Harie offisjeel geinsjtalleierd pes Sjtadsprins Funs II van Zitterd. Nao ‘de aed op ut Marotte vaenke’ krig Funs de bie zien Prinssjap beheurende teikes oetgereik zo es de ketting mit de pappegey en nonnevot, de mötsj mit de vaere en tot sjlot de septer, woonao hae offisjeel es Sjtadsprins Funs II euver ut Zittesj Marotteriek zal regeiere. Nao ut veurlaeze van zien Proklamase zal hae veur de eesjte keer zien Prinse motto ten geheure brenge. Tot sjlot trakteiert Prins Funs II mit de tradisjonele nonnevotteraege op ein richtig Zittesje nonnevot en zengk Cyrille Niël de Vastelaovessjlaager van dit jaor ‘De Sjpeigel’.

Nao aafloup van de zitting is in de Rabobankzaal van de sjouwburg ut Prinsebal mit meziek van De Rambo’s. Kaarte veur de insjtallase zitting zeen te koup in de Marottewinkel op de Brandsjtraot bie Van Neer-Eykeler en bie de Oetbalie van de Sjouwburg.

15-01-2012: 22 JANNEWARIE BÈNNESJTADZITTING IN KAFEE DE BUREN

Op Zondig 22 Jannewarie organiseiert Klup Kump Gout weier in samewirking mit kafee de Buren de Bènnesjtadzitting.

Om 14.11 oer begint ut programm van dees zitting onger angere Frans Theunisz, bekend van de Limburge megahit Sjeng aon de Geng. De ‘Italiaanse’ Mesjtreichtenaer Fabrizio mit ziene Vespa is nao Limburgse vastelaoveshits es ‘Sjiek is mich dat’ en dit jaor ‘Hakke Takke’ al niet mee weg te dènke oet de Limburgse Vastelaovend en auch dit jaor weier prezent op de bènnesjtadzitting. Wiejer op ut Programm Kartoesj, in 2000 biejein gebrach veur ut LVK en sinds toen bienao jeederjaor in de finale van ut LVK mit hun bekende nummesj es ‘Tam Tam’, ’De Prins in de sjtraot’ en in 2006 LVK winnaer mit ‘Dat zit bie os in de femilie’. Naeve dees artieste nog versjillende anger optraejes en verrasjinge. De Marotte mit Sjtadsprins Funs II zulle de bènnesjtadzitting komme bezuike. Veur Prins Funs II is dit de daag nao zien insjellase ut eeste offisjeel bezuik es Sjtadsprins.

Kaarte veur de bènnesjtadzitting koste €5,- en zeen te koup bie kafee de Buren op de Mert.

11-01-2012: 3e HAUF FINALE VAN UT LVK MIT ‘DE SJPEIGEL’ SJTÖMME !!!

In de derde en letste hauf-finale van ut LVK op nömmer 56 de Zittesje Sjlaager van dit jaor ‘De Sjpeigel’ gezonge door Cyrille Niël en gesjeve door John Smeets en Gian Prince. Help ‘De Sjpeigel’opwaeg nao de finale, hieveur höbbe zie eur sjtöm neudig!!! Sjtömme kent door de bonne in te vulle die zeen te venje in de Dagblad de Limburger en ut Limburgsdagblad. Kruuts op de bon nömmer 56 ‘De Sjpeigel’ aan en nog vief anger nömmesj. Nuuj dit jaor is dat bie de hauf-finales auch gesjtömp kent waere via tillefoon en SMS. SMS LVK56 nao 4422 of bel 0909-2027030 en keis dan 56. Let op sjtömme via SMS en tillefoon kent alleen op zaoterdig 14 jannewarie tössje 12.00 en 12.30 oer en op zondig 15 jannewarie tössje 16.00 en 16.30oer. angesj is de sjtöm niet geldig!! De tweede hauf-finale van ut LVK is op zaoterdig 14 Jannewarie tössje 10.00 en 12.00 oer te beloestere en te bekieke op L1 Radio en L! TV. DE oetzending wurt op zondig 15 jannewarie tössje 14.00 en 16.00 herhaalt op L1 Radio. Sjteun Cyrille, John en Gian mit ‘De Sjpeigel’ op waeg nao de finale van ut LVK en sjtöm!!! LVK56!!!

08-01-2012: RIDDER IN DE ORDE VAN DE PAPPEGEY: FIENY MOERSKOFSKI-CALS

Aan ut begin van de Cirque de Marot is Fieny Moerskoski-Cals geridderd in de Orde van de Pappegey. Fieny kump oet ein richtig Vastelaovesnes, zo is ut dit jaor 66jaor geleje dat häöre pap woort oetgroupe pes Sjtadsprins. Fieny is al jaore langk zengeres van Zittesje Vastelaovesliedjes op de Marotte LP’s en CD’s. En zengk zie regelmaotig op zittinge en zèngk zie jeederjaor bie ut Kanon van ut Balkon ‘veer höbbe eine Prins’ veurdat de Sjtadsprins de sjtadssleutel krig euvergedrage. De letste jaore zèngk zie regelmaotig same mit häöre man Roy Moerskofski, zo sjtonge zie in 1999 mit ‘Ich höb dich’ same in de finale van ut Limburgs vastelaovesleedjes Konkour. Dat ut zenge in de femieje zit blik oet dat dochter Lisanne dit jaor in ut koor mit haet gezonge op de marotte CD. Naeve ut zenge zèt Fieny zich aktief in veur de jeug, zo is zie ein grote sjteun veur de jeugkemisse van de Marotte en prizenteierd zie al jaore langk de Zittesje Kenjerzitting. Wiejer is Fieny lid van de redaksie van de pappegey, auch hie is Fieny ein drievende krach achter ut jeug gedeilte dat jeederjaor in de Pappegey sjteit. Fieny haet meermaols mitgetrokke in zowaal de Kenjer es Grote Optoch mit femieje en anger groppe. Eine vrouwelikke Ridder is bezunjer want Fieny is pas nao May Laudy-Donners in 1982 en Tilly Eykenboom in 2000 de driede vrouwelikke Ridder in de gesjiedenis van de Marotte.

05-01-2012: OETRUIPING NUUJE SJTADSPRINS EUVER DE GANSE WELT LAIF TE VOLGE VIA MAROTTE TV

De oetruiping van de nuuje Zittesje Sjtadsprins op zaoterdig 7 Jannewarie is dit jaor veur de eesjte keer in de gesjiedenis van de Marotte LAIF te volge via Marotte TV. Via de websait van de Marotte (http://marotte.nl/live/) zend Marotte TV ein programm oet rondj Cirque du Marot dat LAIF is te bekieke euver de ganse welt!! De oetzending begint om 20.33 oet en boewt op nao 23.11 oer ut moment dat Vors Marot Harie I ut Tillegram van de Pappegey zal veurlaeze mit dao-op de naam van de nuuje Sjtadsprins, dae zal regeiere euver ut Zittesje Marotteriek in 2012. De ganse welt kent dit moment dit jaor LAIF mit belaeve via Marotte TV, vaste kiekesj van Marotte TV in onger angere Peru, Canada en Australië kenne op dees maneier de oetruiping van de nuuje Prins laif mitmake.

Dees oetzendig is de eesjte laif oetzending van marotte TV ooit, ein histories moment veur de Marotte en Marotte TV. De oetzending is waal nog ein experiment, mer in de veurbereiding is alles draan gedaan dees oetzendig te laote sjlaage. Es de oetzendig ein sukses wurt is ut muigelik dat in de toekoms mee oetzendige van Marotte TV laif waere oetgezonje. De oetzending wurt op zondig 8 jannewarie nog eine keer herhaalt op Marotte TV.

02-01-2012: 2e HAUF FINALE VAN UT LVK MIT ‘VASTELAOVEND OP RESEP’ SJTÖMME !!!

In de tweede hauf-finale op nömmer 24, oet Zitterd Gein Haor Baeter mit ‘Vastelaovend op Resep’ (teks en meziek van Petro Willems en Ed Geilen). Veurig jaor wiste zie mit ‘Doe bès geweldig` de finale te haole van ut LVK en zie haope dat dit jaor weier te doon. Hierveur höbbe zie eur sjtöm neudig!!!

Ut sjtömme bie de hauf finales is dit jaor verangerd, Ut sjtömme kent door de bonne in te vulle die zeen te venje in de Dagblad de Limburger en ut Limburgsdagblad. Kruuts op de bon nömmer 24 ‘Vastelaovend op Resep’ aan en nog vief anger nömmesj. Nuuj dit jaor is dat bie de hauf-finales auch gesjtömp kent waere via tillefoon en SMS. SMS LVK24 nao 4422 of bel 0909-2027030 en keis dan 24. Let op sjtömme via SMS en tillefoon kent alleen op zaoterdig 7 jannewarie tössje 12.00 en 12.30 oer en op zondig 8 jannewarie tössje 16.00 en 16.30oer. angesj is de sjtöm niet geldig!!

De tweede hauf-finale van ut LVK is op zaoterdig 7 Jannewarie tössje 10.00 en 12.00 oer en op zondig 8 jannewarie tössje 14.00 en 16.00 te beloestere op L1 Radio. Nuuj dit jaor is dat de hauf-finale op zaoterdig auch op L1 TV en de websait van L1 wurt oetgezonje.

Sjteun ‘Gein Haor Baeter’ op waeg nao de finale van ut LVK en sjtöm!!! LVK24!!!

02-01-2012: OETRUIPINGSAOVEND SJTADSPRINS 2011: CIRQUE DU MAROT

Zaoterdig 7 Jannewarie is de oetruiping van de Zittesje Sjtadprins 2012. Ongertössje tradisjoneel is de oetruiping Cirque du Marot in de Sirktent van ut Limburg Kerstcircus aan de Haspelsesjtraot. Nao de intoch van de Marotte, Vors marot Harrie en de nog regeierende Prins Tom I, zal vors marot Harrie veur de eesjte keer deze aovend ut Tillegram van de Pappegey veurlaeze om de nuuje Ridder in de Orde van de Pappegey bekent te make. Dees ongersjeiing wurt jeederjaor oetgereik aan eemes mit grote verdeinste veur de Zittesje Vastelaovend en de Zittesje cultuur.

Vervolges begint de veursjtelling van Cirque du Marot mit de internasjonaal top artieste van ut Limburgs Kerstcircus. Van de sirk zeen onger angere de topekts te bewonjere es Glen Nicolodi (de man mit de hondj), akrobatiek van The Alexander Troup, Balasz Foldvary akrobaat op eine BMX-fits, de moterriejesj van The Infernall Madness en de Rolsjaatsesj van Trio Veslovski. Naeve dees topekts oet de Sirk optraesj van Jazz Dance Swentibold, Limburgs Kampioen Zaatehermeniekes 2011 de Kapel Jonge Klaore en ein optraeje van Kunstrijwielvereniging De Heidebloem. Tot sjlot nog ein sjpektakulaere verrassjings-ekt. De muzikaal omliesting is in henj van de Marottekapel.

Es de klok 23.11 oer aangeef brik ut sjpannende moment van de aovend aan: Wat zal de nuuje Prins waere ? Naodat de Marotte mit Sjtadsprins Tom I weier in de piste zeen ingekomme zal volges tradiesie de ‘Prinsedruim’ en ‘Heur veer alleney’ waere gezonge waonao Vors Marot Harie ut Tillegram van de Pappegey zal veurlaeze mit dao-in de naam van de nuuje Stadsprins 2012. De oetruiping wut aafgesjlaote door Cyrille Niël mit de Vastelaovessjlaager van dit jaor ‘de Sjpeigel’ dat ut liefleed van de nuuje Prins zal waere.

Nao aafloup is in de 't sirkkaffee ut Marottebal mit meziek van Zaelke Power. Kaarte veur Cirque du Marot zeen veur €16,50 te koup in de Marottewinkel en bie de Sigarezaak Augustus van neer op de mert in Zitterd. Es in de veurverkoup neit alle kaarte zeen oetverkoch dan zeen vanaaf 19.33 in ut Sirkkaffee bie de kraom van de Marotte de letste kaarte te koup.

De naam en alle informase euver de nuuje sjtadsprins zeen vanaaf zondigmorge 8 jannewarie hiej op de site te laeze.

19-12-2011: ZITTESJE LEEDJES IN DE HAUF FINELES VAN UT LIMBURGS VASTELAOVESLEEDJES KONKOUR

Twee Zittesje leidjes zeen doorgedronge pes de 60 Hauf-finaliste van ut Limburgs Vastelaovesleedjes Konkour 2012. De eesjte is de Zittesje sjlaager van dit jaor ‘De Sjpeigel’ van John Smeets en Gian Prince mit zangk van Cyrille Niel. Es tweede Zittesj leidjes in de hauf-finales Petro Willems en Ed Geilen, baeter bekend es Gein Haor Baeter mit ‘Vastelaovend op Resep’, zie sjtonge aafgeloupe jaor in de finale van ut LVK en maake kans dat kommend jaor nog ens euver te doon.

De oetzendinge van de hauf-finales van ut LVK zeen op zaoterig 31 december, 7 jannewarie en 14 jannewarie op L1 radio en dit jaor auch op L1TV. In welke oetzending welk leidje is te heure wurt bènnekort door laoting bepaold.

De finale van ut Limburgs Vastelaovesleedjes Konkour 2012 is op vriedig 3 Fibberwarie 2012 in Eijsde-Margraote. Haopelik mit Zittesje leidjes bie de 19 finaliste. Dus vergaet bie de hauf-finales niet te sjtömme en sjteun de Zittesje leidjes op waeg nao de finale.

19-12-2011: HÖB GEER NUUTS OF FOTOOS VEUR DE PAPPEGEY ? DAN NOE INSJIKKE !!

In Fibberwarie vlug de Pappegey ut jaorblaad van de Marotte weier oet. De redaksie van de pappegey is onopvallend al ut ganse jaor bezig mit ut verzamele van sjpraakmakende verhaole en foto's. Hiebiej zuik de redaksie noe ouch eur hulp !! Höb geen ein sjpraakmakend verhaol, onthullende foto's of get angesj wao geer van dengk dat mot in de Pappegey? Wach dan neit te lang en sjtuur dit nao de redaksie van de Pappegey en wae wit kent gans Zitterd dit binnekort laeze in de Pappegey en wurt euver eur nuuts door gans Zitterd nog lang nao gekald.

Sjtuur eur verhaol of foto's nao Sjtadsvastelaovesvereiniging de Marotte Zitterd, t.a.v. Redaksie de Pappegey, postbus 256, 6130 AG Sittard of via e-meel nao pappegey@marotte.nl

Tekste gaer aanlevere in ut Zittesj Plat, zeet geer neit gans op de heugte van ut Zittesj plat dan zal de redaktie ut omzette in ut richig zittesj. Vermeld bie eur verhaol of foto's naam, adres en tillefoonnummer zodat de redaksie es ut neudig is kontak mit uch kent opnumme. De redaksie van de pappey sjteld de pappegey same en dan kent ut gebeure dat neit alle inzendinge geplaatsj kenne waere. Es eur inzending neit in de pappegey trok is te venje is hiejeuver gein korrespondesie meugelik. Nao ut versjiene van de Pappegey zal de redaksie weier veur ein jaor ongerduuke.

13-12-2011: 18 DECEMBER VEURVERKOUP VROULUUJZITTING

Op Zondig 15 Jannewarie organiseiere de Flanelle Lepkes weier de Vrouluujzitting. Dees zitting wurt net es veurigjaor gehauwte Oos Kaar in Euverhaove. Tradisjoneel haet de Vrouwluujzitting ein orzjineel en ludiek thema, dit jaor is ut thema XXL in de ruumste zin van ut woord. De dames van de Flanelle Lepkes komme zellef XXL op ut toneel en zörge veur ein XXL progamm veur de vrouluuj.

De veurverkoup van de vrouluujzitting is op Zondig 15 Jannewarie vanaaf 14.00 oer in ut bekende kafee de Kup op de Lömmerichersjtraot. Om de wachtende vrouluuj neit te lang in de kouw te laote sjtaon aopene de oetbatesj van de Kup Jan en Corine de deur al vanaaf 9.00 oer. Dan is ut wae ut eesj kump dae krig auch es eestje kaarte!! De kaarte koste €15,- (maximaal 2 kaarte per persoon) en die zeen zo wie jeeder jaor sjnel oetverkoch, dus kom oppe tied!!

02-12-2012: DE SJTADSSJOOL MIT ‘TREK MER MIT OS MIT’ IN DE FINALE VAN UT KVL

De Sjtadssjool is mit ut Zittesj KenjerVastelaovesleedje ‘Trek mer mit os mit’ doorgedronge pes de finale van ut Kinger Vastelaoves Leedjesfestival. In de veurronje euvertuugde de Sjtadssjool mit hunne zangk en dans en dat bekroonde de zjurie mit ein plaatsj in de finale. In de finale zal de Sjtadssjool ut opnumme taege 10 anger finaliste oet gans Limburg. De finale van ut KVL is op Zondig 29 Jannewarie 2012 in Palladio in Helden. Begin November höbbe de Marotte ein vidiejoklip opgenomme van de Sjtadssjool mit ‘Trek mer mit os mit’, dees viediejoklip is hiej te bekieke.

28-11-2011: UNIEK LAESBOUK MIT EIN ZITTESJ VASTELAOVESVERHAOL TE KOUP

Op zaoterdig 26 November versjeen op inisjatief van de jeugkemisse van de Marotte ein uniek (veur)laesbouk mit ein Zittesj Vastelaovesverhaol veur kenjer tössje de 4 en 10 jaor. Ut verhaol is op verzuik van de Marotte gesjreve door Patrick Werdens veur eine veurlaes middig in de biebjoteek. De Marotte höbbe ut verhaol vervolges pes ein uniek bouk laote make en Sandy Moerskofski haet ut bouk veurzeen van illustrasies.

Ut verhaol is ein richtig Zittesj Vastelaovesverhaol mit es tittel ‘Pap es ich groot ben’. Ut verhaol geit euver Sjarelke en zien zösterke Reineke, die in de druim van Sjarelke mit behulp van ein sjpelfiguur eine Vastelaovesoptoch biejein kriege. Es hoogte punt Sjarelke es Prins op ziene eige geboewde Prinsewaage van Lego.

Mit ut bouk kenne kenjer toes op de bank of op sjool op ein sjpeelse maneier de vastelaovend belaeve. Zo krig je jong generasie ut richtige Vastelaovesgevuil euver gedrage. Kortom ein bouk dat bie de richtige Vastelaovesvierder in de boukekas niet maag ontbraeke. Ut bouk is te koup in de marottewinkel en kos 11 Euro.

23-11-2011: DE MAROTTEWINKEL GEIT WEIER AOPE
Op Zaoterdig 26 November om 12.11 oer aopene de Marotte weier hunne eige winkel, deze is te venje in de modezaak Van Neer Eijckeler op de Brandjstraot 11 in Zitterd.
Te koup zeen de kaarte veur alle Marotte zitting en ut Gala Prinse Bal. Natuurlik is auch de nuuje CD 'De Sjpeigel' mit dao op de nuuj Vastelaovessjlaagesj te koup en zeen naeve de nuuj CD nog CD's oet veurige jaore te koup. Wieer in ut assortiement van de Marottewinkel perpluuje, sjaals, patsje en nog mee sjpulle allemaol veurzeen van ut Marotte logo. Nuuj dit jaor is ein rood-gael-gruin sjaal mit ut logo van de Marotte en de sky-line van Zitterd, ein anger nuuj artikel in de winkel is ein uniek bouk euver de Zittesje Vastelaovend sjpisjaal veur kenjer tössje de 3 en 8 jaor.
Nao nuujjaor is ein sjpenkske te koup van de nuuj jaororde van de Marotte, anger sjpengskes mit oa de Jaorordes van de veurige jaore zeen al vanaaf de aopening te koup.

In de loup van ut sezoen zeen auch de Pappegey te koup (vanaaf 11 fibberwarie) en op zaoterdig 18 Fibberwarie ut programbuikske van de groote optoch.
De Marottewinkel is pes Vastelaoveszaoterdig geaopend op zaoterdige tössje 10 en 17 oer, jeedere donderdig tössje 10 en 14 oer en op koupzondige tössje 12 en 17 oer. Sjpisjaal veur vrunj van de Marotte is ein veurverkoup op zaoterdig 26 November tössje 10.11 en 14.11 oer. Dit jaor is ut auch muigelijk om te betale mit Pin.
Naeve de Marottewinkel aopende Marotte bennekort auch ein Webshop wo vööl artikele oet de Marottewinkel auch te koup zulle zeen.

15-11-2011: NUUJE MAROTTE CD ‘DE SJPEIGEL’

Tradisjoneel is bie de aopening van ut Vastelaovesszoen aafgeloupe zondig de nuuj Marotte CD geprizzenteierd. Op dees CD de veier wennende Vastelaovesleedjes mit de Sjlaager ‘De Sjpeigel’ gesjreve door John Smeets en Gian Prince, gezonge door Auwt Prins Cyrille Niel. Wieer zeen dat nömmer 2 ‘Wo mit ich haer’, teks en meziek Paul Donners en Bettina en Frans Kamps mit zangk van Lejao Beursgens, nömmer 3 ut door Rene Dirkx gezonge ‘Ich hawt van Zitterd, gesjreve door Hans Wijnands en es letste nömmer 4: ‘Vastelaovend op Resep’ van Petro Willems en Ed Geilen.

Ut Kenjer Vastelaovesleidje van dit jaor ‘Trek mer mit os mit’ wurt gezonge door kenjer van Basissjool de Sjtadssjool en is net es de Zittesje Sjlaager gesjreve door John Smeets en Gian Prince.

Naeve dees nuuj leidjes de medley ‘Wae get bewaart dae haet get’ ein medley van Zittesje Vastelaovesleidjes oet de ganse auw doos mit leidjes es ‘Jao zo viere de Marotte Vastelaovend’, ‘Zittesje Sjnaak’ en ‘Dat deiste mer eine keer’. Ein bezunjer leidje in dees medley is ‘De Marotte zulle laeve’. Van dit leidje waar allein de teks bekent, mer de millodie ontbrouk. Nao sjpeurwerk door Rene Haustermans in ganse auw archieve is noe auch de milledie trok gevonje. ‘De Marotte zulle laeve’ is door Jonas Ossendrijver in 1882 gesjreve en is daomit ut auwste Vastelaovesleidje van Zitterd en van gans Limburg.

Es letste nummer op de CD ein bezunjer leidje van Tjeu Maintz zeliger. Tjeu zengk in Amerika akapella dit leidje euver zien heimwee nao Zitterd. Jan Naus dae hööm regelmaotig ging bezuike in Amerika haet dit leidje mit eine bandjrekorder opgenomme bie Tjeu thoes in Amerika. Dees orzjineel opname is door Jan en Emmanuel Theelen digitaal bewirk en veurzeen van meziek veur op de CD. Oprech kent dit ein uniek leidje waere genuimp.

De opname en produksie van dees 40ste meziek produksie van de Marotte (LP’s, Singels, Bendjes en CD’s) is van Jan en Emmanuel Theelen. De teikening op de hoes van de CD is oet de handj van Paul-Jean Jessen en is geisjpireierd op de Sjlaager van dit jaor ‘De Sjpeigel’, wae gout kik herkint dao-in drie bekende zitterder die alles mit de sjlaager van dit jaor höbbe te maake. Marc Webers van studiomarq haet de teikening vervolges verwirk in de vormgaeving van de CDhoes. De CD is te koup in versjillende kafees en winkels in Zitterd (onger angere Foto Ton Dirkx, Wolstreet, V&D,Hendriks textiel) en vanaaf 26 November in de Marottewinkel.

08-11-2011 VIDIEJOEKLIP KENJER VASTELAOVESLEEDJE ‘TREK MER MIT OS MIT’

Nao ut sukses van de vidiejoklip ‘Ut Eesjte Muulke’ van veurig vastelaovessezoen, ein Remix van de sjlaager oer 1979 door Auwt Prins Wouter I, is dit jaor weier ein vidiejoklip gemaak.

De vidiejoklip van dit sezoen is gemaak van ut Kenjer Vastelaovesleedjes 2012 ‘Trek mer mit os mit’ dat wurt gezonge door kenjer van de Sjtadssjool en is gesjreve door John Smeets en Gian Prince. De opnames van dees vidiejoklip geen aafgeloupe zaoterdig gemaak in de historiese Begienehofsjtraot mit de kenjer van de Sjtadssjool, Jazz Dance Swentibold, Prins Tom I, de Marotte en versjillende Vastelaovesvierders.

Ut leidje en de vidiejoklip is gans gemaak is Sjpaanse sfeere.

Ut Kenjer Vastelaovesleedje is auch te beloestere op de nuuj Marotte CD die bie de aopening van ut Vastelaovessezoen op zondig 13 November wurt geprizzenteierd en vanaaf dan de koup is.

De vidiejoklip kent geer hiej bekieke.

04-11-2011: ZONDIG 13 NOVEMBER AOPENING ZITTESJ VASTELAOVESSEZOEN 2011-2012 OPPE MERT

Op Zondig 13 November wurt ut Zittesj Vastelaovessezoen 2011-2012 geaopend op de Mert. Ut programm wurt om 14.44 oer geaopend door de Marottekapel die bie waere gesjtange door onger angere Ron Hunnekens en Paul-Jean Jessen. Nao de muzikaal klanke van de Marottekapel wurt om 15.11 oer door De Marotte, Vors Marot Harrie, Sjtadsprins Tom I en burgemeister Sjraar Cox ut Vastelaovessezoen offisjeel geaopend door ut in wirking zette van de klok die geit aaftelle pes Vastelaoveszaoterd 23.11 oer es de nuuje Sjtadsprins de sjleutel van de sjtad krig euvergedrage door burgemeister Sjraar Cox.

Vervolges wurt de nuuje VastelaovesCD geprizzenteierd genuimp nao de Vastelaovessjlaager 2012 ‘De Sjpeigel’ van John Smeets en Gian Prince. Alle veier de wennende leedjes en ut nuuje Kenjer Vastelaovesleidje waere veur de eesjte keer laif gezonge in de CD arranzjemente. Ut KenjerVastelaovesleidje van dit jaor ‘Trek mer mit os mit’ wurt gezonge door Kenjer van de Sjtadssjool en is net es de Sjlaager ‘De Sjpeigel’ gesjreve door John Smeets en Gian Prince.

Aansjloetend begint ein muzikaal programm mit Limburgse artieste en ‘zeng mit dien idool’. Bie dit letste ongerdeil zenge kenjer van Zittesje basissjoole ein leidje same mit de Limburgse artieste. Op ut programm sjtaon optraejes van 2 voudig LVK winnaer W-Dreej, Kartoesj en ut grootste Limburgse FeesBees Big Benny. Tössje door is auch nog ein optraeje van Lotto, de tweevoudig winnares van ut Limburgs KenjerVastelaovesleedjes Festival en is d’r dans van Swentibold. Veur de kenjer is de ganse middig ein programm mit sjminke, sjpelle en eine balonnekloun. Veur de richte Vastelaovessfeer kump jeederein natuurlik verkleid nar de aopening van ut Vastelaovessezoen toe.

Nao aafloup zeen in de kafees rondj de mert versjillende afterpartys mit (laif) meziek.

05-09-2011: ALTERNATIEVE SJÖTTEKEIZER 2011-2012: LEI KRETZERS VAN KAPEL ‘T KOOSJ BAETER

Aafgeloupe weekend is ut Alternatief Sjöttefees gewaes. Zaoterdigaovend waar ein drök bezochte Keizerresepsie ter ere van Keizer Joep Wijnands (Prins Joep VIII, 1993) van de Auwt Prinse en feesaovend mit de grote Zittesje Keizersreunie. Op zondig waar nao eine raegenechtige mörge ut Alternatief Sjöttefees onger ein zunke in de Sjtadstuin. Nao ut defilee van de deilnummende alternatieve sjötterieje van Zittesje Kapelle en (Vastelaoves) vereiniginge veur de zjurie en Keizer Joep Wijnands trökke de sjötterieje in optoch door de bennesjtad. Nao de optoch woord es eesjte door alle alternatieve sjöttereie gesjaote om de keuningstittel. Naodat alle keuninge bekend waare sjote zien ongerling om de Keizerstittel. Oeteindelik waar ut Lei kretzers van Kapel ‘t Koosj Baeter dae de tempexvoogel wis aaf te sjeite en kroonde zich pes nuuje Alternatieve Sjötte Keizer van Zitterd. Volgendjaor zal Kapel Koosj Baeter dan auch ter ere van hunnen Keizer de Keizerssresepsie en feesaovend op de zaoterdigaovend veur de Alternatief sjöttefees organiseiere.

28-08-2011: VASTELAOVESSJLAAGER 2012: DE SJPEIGEL

In ein bomvolle sjpeigeltent is gisteraovend de Zittesje Vastelaovessjlaager veur Vasteoavond 2012 gekaoze. De aovend begoosj mit Paul Jean Jessen dae nog eine keer de Vastelaovessjlaager 2011 ‘Jo de La’ zong wonao sjriever Thei Wessels de Thei Hunnekens wisseltroffee moosj trökgaeve woveur hae in de plaats ein oorkonde kreeg. Nao dees trökblik op 2011 barsjte de sjteid los veur de titel Vastelaovessjlaager 2012.

Alle ellef de leidjes die in de finale sjtonge woorte laif gezonge waare onger begeilding van de Sint Rosa kapel, wonao gesjtömp koosj waere door jeederein. Gezjureierd woort door alle aanwezige mit de rood, gael of gruin sjtömbiljette en door de prominentezjurie mit onger angere De Geiende oet Hulsberg. In de pauze die volgde om alle sjtömme te telle verzörgde De Geliende oet Hulsberg ein optraeje mit hun leidjes womit zie in de LVK finale sjtonge de aafgeloupe jaore.

Nao de pauze waar ut tied veur de oetsjlaag. Op de veierde plaatsj eindigde ‘Vastelaovend op Recep’, mit teks en meziek van Ed Geilen en Petro Willems, zie zinge ‘Vastelaovend op Recep’ zellef es ut duo Gein Haor Baeter. Op ein derde plaatsj eindigde sjriever Hans Wijnands mit ‘Ich hawt van Zitterd’ dat wurt gezonge door Rene Dirks. Op ein sjoon tweede plaatsj eindigde’Wo mit ich haer?’ Teks en meziek zeen van Paul Donners en Bettina en Frans Kamps en wurt gezonge door Lejao Beursgens.

Es absulute winnaar en dus Zittesje Vastelaovessjlaager 2012 kwaam nao ut telle van de sjtömme nao veurde ‘De Sjpeigel’ mit teks en meziek van John Smeets en Gian Prince. ‘De Sjpeigel’ wurt gezonge door Cyrille Niel. Veurigjaor sjtonge John Smeets en Gain Prince niet in de finale van de Vastelaovessjlaager dit, jaor zeen zie weier volop trok en is ut de neugende keer dat zie de Zittesje Vastelaovessjlaager höbbe gesjreve. Aan ut applaus en de reakties oet de zaal te heure eine verdeinde en geweldige Zittesje Vastelaovessjlaager 2012. Naodat aan John Smeets en Gian Prince de Thei Hunnekens wisseltroffee waar oetgereik door Marianne Hunnekens-de Kok zong Cyrille Niel same mit jeederein dae in de tent aanwezig waar nog eine keer de nuuje Vastelaovessjlaager ‘De Sjpeigel’.

De nummesj 4, 3, 2 en de sjlaager 2012 komme same mit ut Kenjer Vastelaovesleidje 2012 gezonge door kenjer van de Sjtadssjool en auch gesjreve door John Smeets op de nuuje Vastelaoves CD te sjtaon die vanaaf November te koup zal zeen.

24-08-2011: ALTERNATIEF SJÖTTEFEES

In ut weekend van 3 en 4 September is weier ut Alternatief Sjöttefees in Zitterd. Op zaoterdigaovend 3 September organiseiere de Auw Prinse ter eere van hunne Keizer Joep Wijnands (Prins Joep VIII, 1993) ut Keizersfees. Tössje 20.00 oer en 21.00 oer is jeerderen in de gelaegenheid de Keizer te filleceteire mit zien Keizersjap. Nao de resepsie begint de groote Zittesej Keizersreunie. Keizers van euver de ganse welt komme nao ut Zittesj Keizersfees en numme daobiej hun favoeriet artieste mit. De resepsie en Keizersreunie venje plaats in de sjpeigeltent op Cour Solanus achter de Patesjkirk. De muzikaal omliesting van de ganse aovend is in henj van de Big Bend Beeg.

Op Zondig 4 September is dan ut Alternatief Sjöttefees, dat dit jaor wurt gehauwte in de Sjtadstuin (Ursulinetuin) aan de Domenikanewal. Alle deilnummende Alternatieve Sjötterieje, die veural besjaon oet Zittesje (Vastelaoves) vereiniginge en Zittesje kapelle, prizzenteiere zich vanaaf 13.00 oer in ut defile op ein ludieke maneier aan Keizer Joep en aan de zjurie. Nao ut Defile rondj 14.30 oer trekke alle deilnummende alternatieve sjötterieje in optoch door de bennesjtad om aan ut eind van de optoch weier trök te komme op ut feesterrein. Hie gaon alle alternatieve sjötterieje sjeite om de Keuningstitel van hun sjötterie. Dit geit neit wie bie ein echte sjötterie op bölkes of eine houte vogel, mer mit ein wendjbuks op eine tempexvoogel. Es van alle deilnummende sjötterieje de keuninge bekend zeen sjeite alle keuninge taegen-ein om de Keizerstitel. De keuning dae dan de voogel aafsjöt maag zich ein jaor langk Alternatieve SjötteKeizer van Zitterd nuime. De alternatieve sjötterie wao de Keizer lid van is haet veur ut volgendjaor dan de eer ut Keizersfees ter eere van hunne Keizer te organiseiere.

19-08-2011: VERKEIZING ZITTESJE VASTELAOVESSJLAAGER 2012

De zomer is nog niet veurbieij en nog bekans drie maondj pes de 11de van de 11de, mer waal Sint Rosa Kirmes in aantoch. Tradisjoneel is dan op Sint Rosa zaoterdig de Verkeizing van de Zittesje Vastelaovessjlaager veur ut kommende sezoen. Dit jaor is dat op zaoterdig 27 augustus, weier in de sjpeigeltent op Cour Solanus. De Sjpeigeltent is geaopend vanaaf 19.33 oer, de entree per bezuiker vanaaf 12 jaor is dit jaor €2,-, dat is inklesief ein buikse mit alle tekste, ein sjtömbiljet en ein Maotte pen.

Om 20.33 oer begint de sjlaageraovend mit ein trokblik op ’t aafgeloupe sezoen en zingk Paul-Jean Jessen nog eine keer de sjlaager van 2011 ‘Jo de La’, hienao zal de sjreiver Thei Wessels de Thei Hunnekens Wisseltrofee trökgaeve en krig hae daoveur in de plaatsj ein oorkonde. Hienao begint de sjtriet om de Zittesje Vastelaovessjlaager 2012.

In juni is de veurseleksie gewaes en dao oet zeen de volgende 11 finaliste oet nao veur gekomme. Ut belaof eine sjpannede sjlaager avond te waere mit biej de 11 finaliste mer leifs vief sjrievesj/komponiste die eerder al ein of meermaols de Zittesje Sjlaager wiste te sjrieve, daenaeve nog ens drie sjreivesj/komponiste die eerder op de plaatsje twee per veier wiste te eindigde.

In volgorde van optraeje zeen de finaliste:

- ‘Foele Poele’; teks en meziek van de titelverdeidiger Thei Wessels

- ‘Drenk eine mit’; teks Theo Weijman en meziek Mark Willems

- ‘t is Vastelaovend hiej’; teks en meziek Reinhard Wind
- ‘Ich hawt van Zitterd’; teks en meziek Hans Wijnands
- ‘De Sjpeigel’ teks en meziek Sjohn Smeets en Gian Prince
- ‘Vastelaovend op resep’; teks Ed Geilen en meziek Petro Willems
- ‘Noe hiej en mit dich’; teks en meziek Ger Muijrers
- ‘De Lèkkesjte Nónnevot’; teks en meziek Raymond Goulding en Har van der Wiel
- ‘Allieket Tekiella’; teks en meziek Rob Hodzelmans
- ‘Wo mót ich haer?’; teks Paul Donners en meziek Bettina Kamps
- ‘Köpke wie ein döpke’; teks en meziek Sjef Weijman en Jack Vahsen

Alle ellef de finaleleedjes waere laif gezonge door Zittesje zengesj en zengeresse en laif begeleid door de veur de sjlaageraovend geformeierde ‘Sint Rosa Kapel’. Naodat alle ellef de leidjes zeen gezonge waere nog eine keer de refreine gezonge om ut geheuge op te frisje. Waonao jeederein kent sjtrömme welk leedje de sjlaager 2012 mot waere.

De zjurie van Vastelaovessjlaager 2012 besjteit oet ein vakzjurie en alle aanwezige die in bezit zeen van ein sjtömbiljet. Prins Tom I zal bie lottrekking bepaole welke kleur sjtömbiljet zal mittelle veur de oetsjlaag. In pauze es de sjtömme waere geteld is ein optraeje van De Geliende oet Hulsberg, zie höbbe al meermaols in de finale van ut LVK gesjaon en eindigde aafgeloupe jaor tweede mit ‘Wo zit ’t bie dich?’.

Nao de pauze waere de nömmersj veier, drie, twee bekend gemaak en gezonge. Waonao es letste de Vastelaovessjlaager 2012 van Zitterd wurt bekend gemaak. Oet henj van Marianne Hunnekens – de Kok, krig de sjriever van de sjlaager de Thei Hunnekens Wisseltrofee oetgereik en zal de zenger de sjlaager nog eine keer te geheure brenge, dae door alle aanwezige zal waere mitgezonge. Nao aafloup is ein afterparty mit meziek van eine DJ. De veier wennende leedjes komme same mit onger angere ut Kenjer Vastelaovesleedje 2012 op de nuuj Zittesje Vastelaoves CD veur 2012 te sjtaon.

Ein veuroetblik op de Verkeizing van de Vastelaovessjlaager 2012 mit versjillende sjrievesj kent geer noe al bekieke via Marotte TV.

17-06-2010: FINALISTE ZITTESJE VASTELAOVESSJLAAGER 2012

Op de daag veur ut begin van de zoomer op 20 Juni is in Zitterd al ein begin gemaak veur de Vastelaovend 2012. Op deze aovend is de veurseleksie gewaes veur de Zittesje Vastelaovessjlaager 2012.

De zjurie die besjtong onger angere oet Sjtadsprins Tom I, Ridder in de Orde van de Pappegey 2011, muzikante, dialek kennesj, prieswinnaesj oet de optochte van 2011 en de eigenaesj van ut Sjoonst Verseierede kaffee. Oet 23 ingezonje leedjes höbbe zie de 11 finaliste veur de Zittesje Vastelaovessjlaager 2012 gekaoze.

Ut belaof dit jaor ein sjpannde finale te waere mit biej de 11 finaliste vief Sjrievesj die al eerder ein of meermaols de wennende Zittesje Vastelaovessjlaager wiste te sjrieve. Daonaeve nog ens veier sjrievesj/componiste die meerdere kere bie de eesjte veier van de sjlaagerverkeizing wiste te eindige.

Ut telle van de sjtömme onger leiding van Notaris Mr. Tim Gielens leverde ongesjtaonde ellef finaliste op. Sjtadsprins Tom I haet bie laoting de volgorde bepaold van optraeje.

In volgorde van optraeje zeen de 11 finaliste:

- ‘Foele Poele’; teks en meziek van de titelverdeidiger Thei Wessels

- ‘Drenk eine mit’; teks Theo Weijman en meziek Mark Willems

De verkeizing van de Zittesje vastelaovessjlaager 2012 is op Sint Rosa Zaoterdig 27 Augustus, in de bekende sjpeigeltent op Cour Solanus. Oet de 11 finaliste wurt dan door de vakzjurie en ut volk van Zitterd de Zittesje Vastelaovessjlaager veur ut sezoen 2012 gekaoze. De sjriever van de winnende sjlaager krig de Thei Hunnekens Wisseltrofee oetgereik.

Veer danke Sjtadsvastelaovesvereiniging De Marotte Zitterd, fotograaf Ton Dirkx en

grafies ontwerper MarQ veur ut besjikbaar sjtelle van tekste, foto’s en illestrasies.